Minister Wendrick Cicilia ta anuncia inicio di embeyecemento di Eagle Beach

Dialuna mainta, Minister Wendrick Cicilia conhuntamente cu Minister René “Baba” Herde y e expertonan di DOW a anuncia un proyecto bunita y importante pa sigui fortifica e producto turistico di Aruba. E ultimo fase pa e esfuersonan pa embeyece Eagle Beach lo inicia pronto. Prome cu duna inicio na e proyecto lo bin cu e proceso di aanbesteding. “Awe nos a bin hunto pa por mira e diferente trabounan cu mester ehecuta y tambe mira e necesidadnan pa fortifica nos producto turistico”, Minister Cicilia a expresa. E mandatario a continua bisando cu: “Algo cu ta laga Aruba resalta for di e demas destinacionnan ta un infrastructura moderno y agradabel cu ta crea ordo tambe.”  Nos santo blanco Den e ultimo fase di embeyecemento por mira tambe un rol funcional. Hopi bes e vehiculonan di motor ta parkeer riba nos santo blanco, esaki ta algo cu por causa molester y daño na un di nos recursonan economico natural mas importante cu nos ta conta cu ne. Si nos mira bon, locual ta haci Aruba atractivo ta nos santo blanco y nos lama cu ta internacionalmente reconoci como un di esunnan di mas bunita rond mundo.  Conserva y proteha Minister di Turismo, mr. Wendrick Cicilia conhuntamente cu Minister di Infrastructura, Rene Herde y DOW tin un tarea pa conserva y proteha nan. Cu e proyecto nobo aki, lo conta cu un ‘Turtle Wall’ cu lo impedi cu e vehiculonan di motor ta parkeer riba e santo blanco. Ademas lo tin espacio pa parkeo como tambe toilet y lo embeyece e area aki di Eagle Beach. E ta un inversion di aproximadamente 5 miyon florin.  Cuid’e y mehor’e Di su banda, Minister Rene “Baba” Herde a duna di conoce cu nos recursonan natural ta un di e motibo dicon turistanan ta scoge pa bin Aruba, esey ta nos economia y nos tin cu cuid’e y mehor’e. E plannan di Minister mr. Wendrick Cicilia ta conta cu sosten di Minister Herde. E expertonan di DOW a pinta mapa y a diseña, ademas a tene cuenta kico ta e necesidadnan den e area manera area di parkeer, espacio pa hende cana y asina percura pa e lama keda protegi.  E proyecto ta parti di e esfuersonan di Gabinete AVP-FUTURO pa percura pa nos infrastructura economico aki sirbi henter nos pais. Alabes nos mester percura pa e mantencion di locual nos ta crea. Parti e mantencion ta limpiesa, diasabra awo lo inicia cu Ban Cuida Aruba bou liderazgo di Minister-President  mr.Mike Eman pa percura cu tur area rond di Aruba ta keda limpi. The post Minister Wendrick Cicilia ta anuncia inicio di embeyecemento di Eagle Beach appeared first on 24ora - Prome Den Noticia.