Gerardo Figaroa ta ‘Lion of the Year’ di Aruba Lions Club

Terminando e aña leonistico 2025-2026 e directiva saliente semper ta sondea entre su miembronan e persona cu ta bin na remarca pa haña e premio di “Lion of theYear”. Esaki ta basariba e trabao, dedicacion, aporte na e club. Pa e biaha aki e premio a bay pa Lion Gerardo Figaroa, kende hunto cu su pareha, Lioness Carolina Figaroa, entre otro, a contribui enormemente na e benta di rifa pa e Harley Davidson. Lion Gerardo Figaroa tin mas cu 17 aña caba ta eherciendo diferente posicion den e club y a bira tambe e president nobo di Aruba Lions Club pa aña leonistico 2026-2027. Ta for di un edad jong caba Lion Gerardo Figaroa a traha den e area di servicio pa esnan di mas necesidad den nos comunidad. Den pasado e tawata Vice-Presidente di Kiwanis Key Club, miembro di Bestuur di APA, Secretario y despues Presidente di Organisacion di Cabesantenan di Scolnan Basico, Presidente di Centro di Playa Pabao y desde 2009 te cu presente como miembro activo di Aruba Lions Club. Aruba Lions Club ta un club di servicio cu pa casi 80 aña caba ta trahando incansablemente pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organisacion di servicio mas bieu y mas grandi mundialmente. Programanan cu Aruba Lions Club tin ta entre otro Cama di Hospital y Rolstoel, Smile Mobile, Back to school food bags, reparticion di comestibles durante fin aña y Feria di Salud. Directiva, miembronan di Aruba Lions Club y Leo Club ta felicita Lion Gerardo cu su premio y ta desea pa e sigui persisti y logra tur metenan awor como president di Aruba Lions Club. Ta termina bisando danki pa e apoyo y ta pidiendo pa pueblo keda pendiente pa tur r actividadnan cu ta na caminda. “We Serve” The post Gerardo Figaroa ta ‘Lion of the Year’ di Aruba Lions Club appeared first on 24ora - Prome Den Noticia.