Barco ARC 24 de Julio c’un bishita di training diplomatico na Aruba

E Patrullera di Altamar ARC “24 de Julio”, un di e barconan mas grandi y moderno construi na Colombia, a yega Aruba como su prome destino. E bishita ta den cuadro di un operacion nacional di entrenamento p’e grumetenan, alumno di e Scol di e Suboficialnan di Armada Nacional Colombiano. Durante un presentacion, Comandante di e unidad, Capitan de Navío Diego Colón, a destaca cu e bishita ta refleha e bon relacion entre Aruba y Colombia. El a gradici e caluroso ricibimento di e comunidad Arubiano y a invita henter publico pa bishita e barco durante e open house di diasabra y diadomingo. E patrullera, cu tin 93 meter di largo, 14 meter di hancho y capacidad pa aproximadamente 100 tripulante, ta ekipa cu tecnologia moderno y ta opera cu personal altamente prepara. Segun Capitan de Corbeta Fabián Enrique Román Salom, hefe di Ingenieria, e tripulacion ta encarga di mantene y supervisa tur sistema esencial, incluyendo e motornan, generadornan, sistema di awa potabel, tratamento di awa sushi conforme cu e normanan MARPOL, y e control di consumo di combustibel y e lubricantenan. E personal tambe ta entrena pa responde na diferente tipo di emergencia na lama. Teniente de Fragata Ana María Girón Abadía, Oficial di Comunicacionnan Estrategico, a señala cu un di su funcionnan principal ta comparti informacion tocante e mision y di e barco cu e medionan di comunicacion. El a destaca tambe e participacion creciente di hende muhe den e Armada. Riba e unidad tin seis muhe ocupando diferente posicion, incluyendo navegacion, comunicacion, diseño y servicio di cushina. Pa Grumete Sergio Atencio Bracamonte, alumno di e Armada Nacional di Colombia, cu ta forma parti di e entrenamento riba e ARC “24 de Julio” a expresa su experiencia unico y di gran balor pa su formacion profesional. The post Barco ARC 24 de Julio c’un bishita di training diplomatico na Aruba appeared first on 24ora - Prome Den Noticia.