Ta confirma: Princess Casino ta bay despues di inversion di cinco miyon

Diahuebs den oranan di mainta 24ora.com a combersa cu abogado Ronny Wix, kende a splica cu a sinta cu trahadonan diaranson caba pa informa nan di e situacion. E compania tras di e casino a yega Aruba casi tres aña pasa pa cuminsa prepara pa operacion di e casino mas nobo di Aruba situa riba propiedad di Embassy Suites. Despues di dos aña e edificio tabata cla y mashinnan tabata presente pa por cuminsa cu e operacion. Despues di entrenamento di e personal, na juni 2025 a habri nan portanan. Pero, e abogado a bisa, e situacion no tabata facil y nan a topa cu diferente reto. Pa por haci un operacion legal, mester di un cuenta di banco y esaki tabata e reto di mas grandi cu nan a enfrenta. Te na ultimo ainda tabata purba y diaranson a haya un ordo di corte pa banco habri un cuenta pero pa haci transaccionnan local solamente. Pa loke ta e permisonan necesario tambe tabata un problema.  Ni na DIMP no a acepta pago cash di belastingnan cu nan mester a paga. A manda carta pa splica tur e caminda cu ta canando pa por haya un cuenta pero ni esey a pone cu DIMP a ricibi nan pago. Nan a keda manera mal pagado locual no ta e caso. Kier paga pero DIMP no ta ricibi e placa.  Ademas di e 5 miyon dollar di inversion den e casino cu ta para, y awo ta na mesa cu e trahadonan. Ta dunando nan e pakete di retiro y nan no ta formando problema. Princess Casino a trece tur ekipo di “state of the art”. Pero lamentablemente a cuminsa saca nan di plug, pakete nan pa manda pa nan otro casinonan rond mundo. No tin nada concreto pero si ta parce cu tin un grupo local interesa cu kier tuma parti di e inversion y ta papiando cu doño di e edificio, esta Natura. Mientras cu Princess ta finalisando e proceso pa bandona Aruba. E abogado no por papia di boycott pero si aki aya aya instigacion. Pero cu e doño di e hotel semper a haya bon cooperacion.   Na final abogado Wix a bisa cu e no sa a base di kico DIMP no por tuma placa cash. Nan no por nenga pasobra florin ta un forma di pago legal. Na Hulanda si a cambia ley unda specificamente ta poni cu no ta acepta cash. Pero na Aruba e no t’asina ainda. The post Ta confirma: Princess Casino ta bay despues di inversion di cinco miyon appeared first on 24ora - Prome Den Noticia.