Durante bishita di Secretario di Estado: Qredits Aruba a presenta e prome prestamo BMKB  

Qredits Aruba a ricibi bishita di staatssecretaris van Koninkrijksrelaties en Slagvaardige Overheid, Eric van der Burg, hunto cu Minister di Finansa, Asuntonan Economico y Sector Primario, mr. Geoffrey Wever, na compania local “Vaper Trading” na Balashi. Qredits Aruba a presenta “Vaper Trading VBA” como e prome compania na cual a otorga e prestamo cu un “Borgstelling MKB (BMKB). E gesto aki ta marca e momento importante y esaki a resulta door di e colaboracion entre Qredits Aruba y “Rijksdienst voor Ondernemend Nederland” (RVO). Durante e bishita a ricibi un “tour” di e proprietarionan, Sr. y Sra. Vasquez, y haya un splicacion di nan desaroyo como empresarionan local y tambe e importancia di e prestamo “Qredits “BMKB”” pa logra haci e inversionnan necesario pa por sigui expande nan compania. “Borgstelling MKB-kredieten” (BMKB) Por medio di e programa “BMKB”, e gobierno Hulandes ta duna un parti di garantia pa prestamo cu ta wordo otorga na empresarionan chikito y mediano local na Aruba y tambe na e otro islanan Boneiro, Curaçao y Sint Maarten. E programa aki ta yuda negoshinan chikito y mediano cu tin necesidad di financiamento, pero no tin suficiente garantia pa por logra esaki. E “BMKB” su proposito ta pa aumenta e garantia disponibel y mehora e capacidad di financiamento di e negoshi. Qredits Aruba Pa empresarionan cu mester di sosten financiero, tuma contacto cu Qredits Aruba pa ofrece e informacion rib’e posibilidadnan di e programa “BMKB”. Qredits Aruba ta conoci den e sector empresarial por medio di yuda varios comerciantenan cu micro financiamento te cu AWG 200,000. – pa cuminsa y expande nan propio negoshi. Qredits Aruba tambe ta sostene empresarionan via coaching, recursonan y programanan educacional. The post Durante bishita di Secretario di Estado: Qredits Aruba a presenta e prome prestamo BMKB   appeared first on 24ora - Prome Den Noticia.