Raul Gei: Restauracion di Fort Zoutman ta avansa segun plan

  Gobierno ta sigui inverti den preservacion di patrimonio historico di Aruba Trabounan di restauracion na Fort Zoutman ta sigui avansando segun plan, cu diferente fase importante di e proyecto actualmente den ehecucion. Esaki, confirma door di director di Monumentenbureau Aruba, Raul Gei, durante un follow up tocante e estado actual di e restauracion. Segun Gei, actualmente e enfoke principal ta riba trabounan structural y tecnico pa preserva e monumento historico den un manera sigur y duradero. Entre e trabounan cu ta tuma luga tin mehoracionnan den sistema electrico den colaboracion cu Elmar, restauracion di diferente elemento original di e edificio y trabounan den e area superior di e  toren. Ademas, e proyecto ta inclui renobacion y reemplaso di diferente bentana y porta cu ta mantene e caracter historico original di Fort Zoutman. Gei a enfatisa cu e restauracion ta ehecuta cuidadosamente pa preserva e balor monumental y autenticidad di e edificio. “Nos ta satisfecho cu e progreso di e trabounan y cu e manera profesional y sigur cu e proyecto ta ehecuta,” asina Gei a expresa. Segun Monumentenbureau, e meta ta pa tin un gran parti di e restauracion cla prome cu fin di aña. E proyecto ta forma parti di e vision mas amplio di Gobierno di Aruba pa preserva y revitalisa patrimonio historico y cultural di nos isla. Willem III toren, como e monumento historico mas antiguo di Aruba, tin un significado special den historia y identidad nacional di Aruba. Gobierno di Aruba anteriormente a enfatisa cu e restauracion di e fort ta un prioridad importante den cuadro di preservacion di herencia cultural y fortalecemento di turismo cultural. Durante añanan reciente, Gobierno di Aruba a intensifica inversionnan den patrimonio y restauracion historico, incluyendo colaboracion cu partnernan internacional y diferente iniciativa den cuadro di 40 aña di Status Aparte. Segun Prome Minister Mike Eman, preservacion di monumentonan historico no solamente ta importante pa proteha nos historia, pero tambe pa fortalece identidad nacional y crea mas oportunidad pa educacion, cultural y turismo. Monumentenbureau Aruba ta sigui coordina e proyecto hunto cu diferente experto tecnico y stakeholder pa garantisa cu e restauracion di Willem III toren ta cumpli cu e standarnan necesario pa preservacion di patrimonio monumental, tambe a informa cu e proyecto total ta consisti di 3 fase, fase 1 ta restauracion di e toren, fase 2 ta e restauracion di e fort y gebouw (museo), fase 3 ta nieuwbouw unda e bar existente ta localisa.   The post Raul Gei: Restauracion di Fort Zoutman ta avansa segun plan appeared first on Aruba Native.