Aruba Oficialmente Reconoci como Reserva di Biosfera di UNESCO

  5 di Juni 2026 – Awe, e di 38 sesion di e Conseho Internacional cu ta coordina e Programa “Man and the Biosphere (MAB)” di UNESCO, teni na Hernandarias, Paraguay, a aproba oficialmente e designacion di Reserva di Biosfera na Aruba, reconociendo e isla henter como parti di e Red Mundial di Reservanan di Biosfera di UNESCO. E reserva ta cubri e isla completo, cu un superficie di aproximadamente 19,300 hectar y incorporando e Zona Economico Exclusivo (EEZ) di casi 3 miyon di hectar. E Reserva di Biosfera di Aruba ta consisti di aproximadamente 108,000 habitante. E logro historico aki ta resultado di un proceso fuerte y inclusivo di co-construccion cu a involucra institucionnan gubernamental, comunidadnan local, sociedad civil, cientifico y stakeholdernan di sector priva, cu asistencia tecnico di e Oficina Regional di UNESCO pa e Caribe. “E concepto di reservanan di biosfera ta particularmente adapta na e realidad di Caribe y di Estadonan Insular Chikito den Desaroyo (SIDS),” segun Eric Falt, Director y Representante di UNESCO pa e Oficina Regional di UNESCO pa Caribe. “E teritorianan aki ta demostra con conservacion di biodiversidad, herencia cultural y desaroyo sostenibel por bai man den man. Nos ta spera cu e designacion di Aruba lo inspira otro paisnan den e region pa considera e modelo aki y uni na e Red Mundial di Reservanan di Biosfera.” Prome cu e designacion di Aruba, e region Caribe di hable Ingles y Hulandes tabata conta cu solamente dos reserva di biosfera: e Reserva di Biosfera Saint Mary’s na Saint Kitts & Nevis y e Reserva di Biosfera North East Tobago na Trinidad & Tobago. Aruba awor ta fortifica e presencia di Caribe den e red global aki y ta reforza e rol di e region den e avance di enfokenan inovativo pa sostenibilidad. Apesar di su tamaño modesto, Aruba ta un tera di contraste extraordinario y rikesa natural remarcabel. Su paisahenan relativamente seco, cu por parce severo na prome mirada, ta revela un herencia bibo excepcional. Cadushinan halto, matanan unico adapta na e desierto y especienan di parha scars ta demostra cu bida ta florece hasta den e medio-ambientenan mas inespera. Na e costa di e isla, mangrovenan y veldnan di yerba di lama ta sirbi como vivienda esencial pa bida marino, mientras rifnan di coral ta prospera bou di e awa di lama Caribe. Hunto, e ecosistemanan aki no solamente ta fungi como refugio pa especienan scars y endemico, pero tambe ta sostene existencia, ta fortifica resilencia contra mal tempo, y ta preserva e herencia natural y cultural rico di Aruba. Mirando dilanti, estableciendo e Reserva di Biosfera di Aruba ta posiciona e isla como lider den desaroyo sostenibel den e region di e Caribe. E ta habri porta pa cooperacion regional reforza cu Saint Kitts & Nevis, Trinidad & Tobago, como tambe otro reservanan di biosfera den e Cuenca di Caribe — incluyendo Cuba, Republica Dominicana y Haiti. E designacion lo permiti Aruba pa comparti lesnan siña mientras ta beneficia di e experiencianan, inovacionnan y experticio cientifico di reservanan di biosfera na tur caminda rond mundo. Tambe ta manda un mensahe potente na islanan bisiña cu sostenibilidad no ta un vision lehano, sino un realidad practico y alcansabel. Reservanan di Biosfera di UNESCO ta reconoci internacionalmente como “lugarnan di aprendisahe pa desaroyo sostenibel” na nivel local, nacional, regional y global. Nan ta sirbi como sitionan pa test metodonan interdisciplinario pa compronde y maneha e interaccionnan entre sistemanan social y ecologico, incluyendo conservacion di biodiversidad, diversidad cultural y maneho sostenibel di recursonan. E teritorianan aki ta provee solucionnan local pa desafionan global, promoviendo metodonan cu ta reconcilia conservacion di naturalesa cu desaroyo sostenibel. Na e apertura di e di 38 sesion di e Conseho Internacional cu ta coordina MAB, e Red Mundial di Reservanan di Biosfera tabata conta cu 784 sitio den 142 pais. Durante e sesion di e aña aki, e Conseho a studia un serie nobo di nominacionnan y peticion pa extension for di tur caminda rond mundo, incluyendo Aruba, reflehando e momentum internacional creciente pa sostenibilidad, resilencia climatico y conservacion di biodiversidad. E designacion di Aruba como Reserva di Biosfera ta marca un momento historico pa e isla, pa e region di e Caribe y pa e movimiento global pa un futuro mas sostenibel y resiliente. The post Aruba Oficialmente Reconoci como Reserva di Biosfera di UNESCO appeared first on Aruba Native.