Eduard Pieters – Evaluacion di ‘Landspakket’ ta positivo: Aruba, Corsou y Sint Maarten a demostra exito cu e areglo mutuo

  Durante e reunion di tripartiet cu a tuma luga awe mainta, e topico principal tabata e evaluacion di e ‘Landspakket’ E resultadonan di e evaluacion aki, analisa pa un experto independiente, a resulta fuertemente positivo pa Aruba, Corsou y Sint Maarten. E resultado aki ta wordo bisto como un triunfo pa e islanan cu a para firme den pasado contra e imposicion di un Ley di Reino (Rijkswet). Lider di fraccino di PPA ta indica cu e  evaluacion, cu a duna un bista riba e reformanan introduci despues di e pandemia di COVID-19, a wordo cualifica como uno altamente fiahabel (“betrouwbaar”) debi na e bista neutral di e experto. E reportahe ta confirma cu e islanan structuralmente ta implementando e cambionan pa haci nan finanzas y gobernacion mas fuerte. Pa compronde e exito actual, mester bay atras  na e origen di e Landspakket. Durante e crisis di pandemia, Hulanda a duna yuda financiero structural, pero a exigi pa mara e reformanan aki na un Rijkswet. E intencion inicial tabata pa introduci esaki prome via e Caribische Hervormingsentiteit (CHE) y despues via e organo COHO (Caribisch Orgaan voor Hervorming en Ontwikkeling). Sinembargo, danki na un union solido entre Aruba, Corsou, Sint Maarten y cu sosten di Parlamento di Hulanda, e propuestanan ey a wordo bari for di mesa. E islanan a opta pa aplica Articulo 38, inciso 1 di e Statuut, optando pa un onderlinge regeling (areglo mutuo) en bes di un Rijkswet. Segun parlamentario Eduard Pieters tur tres pais a para firme pasobra nos a bisa: ‘No, nos no kier esaki den un Rijkswet, nos kier esaki via un onderlinge regeling.  Awor, tres aña despues di e firma di e areglo mutuo na 2023, e datonan ta duna e islanan rason. E puntonan di mas grandi cu a wordo saca afo for di e evaluacion ta: Propiedad di e proceso (Ownership): Aruba, Corsou y Sint Maarten a mantene e control y mando riba nan propio procesonan di reforma, en bes di laga esaki den man di un organo impone pa Hulanda. Resultadonan exitoso: E evaluacion independiente ta cuadra cu e vision cu Aruba tabatin caba pa mehora su maneho y procesonan interno. Resiliencia economico: E reformanan a wordo implementa simultaneamente caminda Aruba mester a bounce back y lanta su economia bek, despues di tabata un di e paisnan mas afecta pa e pandemia a nivel mundial.   Ta duna un pabien caluroso na e pueblo di Aruba, specialmente na e ambtenaarnan cu a traha incansabel riba e reformanan aki. E esfuerso aki ta demostra cu e aparato publico tabatin un bon vision y a traha duro pa haci e cambionan aki un realidad exitoso.   The post Eduard Pieters – Evaluacion di ‘Landspakket’ ta positivo: Aruba, Corsou y Sint Maarten a demostra exito cu e areglo mutuo appeared first on Aruba Native.