mr. Edgar Vrolijk (MEP): Mi ta satisfecho con Tripartiet a desaroya 

Den preparacion p’e conferencia di IPKO cu ta cuminsa diabierna, e delegacionnan parlamentario di Aruba, Corsou y Sint Maarten a reuni den un setting tripartiet na Hulanda. Parlamentario mr. Edgar Vrolijk, miembro di fraccion di MEP, a expresa su satisfaccion cu e avansenan logra, specialmente riba e geschillenregeling, cual ta un topico di gran interes p’e islanan den Reino. Durante e reunion di diahuebs mainta, e parlamentarionan a delibera ampliamente riba e areglo di disputa aki. Corsou a presenta algun cambio riba e materia, y diahuebs mainta mes a ricibi e contesta riba e puntonan aki for di Directie Wetgeving en Juridische Zaken (DWJZ) di Aruba. A palabra cu e griffier lo pasa riba e cambionan, y Corsou lo manda di nan tambe na DWJZ pa yega na un formulacion concreto cu ta pas cu e Statuut. Vrolijk a indica cu e pasonan ta positivo y cu pronto por yega na un draft final pa entrega na Tweede Kamer despues di zomer. Un factor clave den e proceso aki tabata e conseho hopi positivo cu a ricibi for di Raad van State. Vrolijk a reconoce cu traha entre tres isla ta trece bista- y pensamentonan diferente dilanti, pero e meta primordial ta pa busca un common ground. E intencion structural ta pa percura pa un miho palabracion di antemano cu Hulanda, actuando manera paisnan grandi y madura p’asina evita di yega na un conflicto legal real. Vrolijk tin speransa cu pa zomer e islanan lo t’asina leu cu e proposicion aki. Pa mas detaye lesa TREMPAN. The post mr. Edgar Vrolijk (MEP): Mi ta satisfecho con Tripartiet a desaroya  appeared first on 24ora - Prome Den Noticia.