Jennifer Arends-Reyes (AVP): Ta trahando riba draft final di geschillenregeling prome cu IPKO

Den preparacion p’e conferencia di IPKO cu ta cuminsa diabierna, e delegacionnan parlamentario di Aruba, Corsou y Sint Maarten a reuni den setting tripartiet na Hulanda. Parlamentario Jennifer Arends-Reyes, lider di fraccion di AVP, a splica cu a ricibi un conseho diahuebs mainta, locual a hiba e tres paisnan Caribense n’e decision pa traha asina mes riba un draft final conhunto p’e geschillenregeling. Arends-Reyes a subraya e gran importancia di yega na un consenso solido pa presenta un solo front den e proceso aki. Fuera di e areglo di disputa, e parlamentarionan a evalua e landspakket di Aruba. Maske a reconoce cu e cambionan structural aki a trece beneficio y subsidio pa capacidad den diferente proyecto importante, e lider di fraccion a señala cu esaki tabata un areglo imponi pa Hulanda riba e islanan. El a indica cu Aruba ta cumpliendo sumamente bon den e sectornan financiero, fiscal y di educacion, pero a enfatisa cu mester busca un maneho den un termino di un of dos aña: “Aruba tin cu wak nos mes con pa sigui cu e proyectonan aki cu nos mesun forsa, pasobra nos no por keda depende pa semper.” Finalmente, no a atende cu e declaracionnan di Secretario di Estado Eric van den Burg ainda den e reunionnan di tripartiet. Segun Arends-Reyes, e momento pa debate lo yega ora IPKO cuminsa formalmente, unda tin un sesion programa cu ne mes y e delegacion lo dirigi e preguntanan necesario den su direccion pa busca claridad. Pa mas detaye lesa TREMPAN. The post Jennifer Arends-Reyes (AVP): Ta trahando riba draft final di geschillenregeling prome cu IPKO appeared first on 24ora - Prome Den Noticia.