Minister Wyatt-Ras a firma Intentieverklaring pa fortalece participacion di hobennan den Reino

  Sint Eustatius – Sra. drs. Melvin Wyatt-Ras, Minister di Asunto Social, a participa den e Conferencia di e Interlandelijke Taskforce Kinderrechten na Sint Eustatius, caminda representante nan di Aruba, Sint Maarten, Boneiro y Sint Eustatius a firma un Intentieverklaring pa fortalece participacion di hobennan den maneho y den asuntonan cu ta afecta nan bida y futuro. E conferencia tabata enfoca riba Meaningful Youth Participation y a reuni representantenan di gobierno, diferente organisacion y partnernan pa explora maneranan di fortalece e participacion di mucha y hobennan den asunto cu ta impacta nan bida. Durante e encuentro, participantenan a analisa un estudio di UNICEF tocante e situacion di derechonan di mucha den Caribe Hulandes y a intercambia experiencia riba iniciativanan dirigi na fortalece e bos di hobennan. Durante e ceremonia, Alida Francis, Island Governor di Sint Eustatius; Melissa Gumbs, Minister di Educacion, Cultura, Hoben y Deporte di Sint Maarten; Melvin Wyatt-Ras, Minister di Salubridad, Asunto Social, Cuido pa Adulto Mayor y Maneho di Adiccion di Aruba; y Timoteo Silberie, Eilandgedeputeerde di Boneiro encarga cu Samenleving & Zorg, a firma un Intentieverklaring. E Intentieverklaring ta confirma e compromiso comparti di e paisnan y entidadnan publico participante den e Interlandelijke Taskforce Kinderrechten pa fortalece e derechonan di mucha y pa promove participacion mas activo di hobennan den asuntonan cu ta toca nan directamente. Minister Wyatt-Ras a enfatisa cu firmamento di e Intentieverklaring ta representa un compromiso concreto pa converti palabra den accion. Segun e Minister, ta importante cu e bos di mucha y hobennan no solamente ta wordo scucha, sino cu nan tambe haya oportunidad pa contribui activamente na asuntonan cu ta impacta nan futuro. El a señala cu cooperacion entre e diferente paisnan y islanan den Reino ta indispensabel pa logra resultado positivo y duradero pa e siguiente generacionnan. Minister Wyatt-Ras a participa den e conferencia hunto cu Natasha Anthony (Chief of Staff), Misha Raymond (Youth Policy Coordinator), y Yvonne Bermudes y Sacha Geerman (Policy Officers), cu a forma parti di e delegacion di Aruba y a aporta activamente na e intercambio di conocemento y discusionnan tocante derechonan di mucha y participacion di hobennan. E Interlandelijke Taskforce Kinderrechten ta basa riba e Tratado di Nacionnan Uni tocante e Derechonan di Mucha y ta enfoca riba cooperacion, intercambio di conocemento y coordinacion di accionnan comparti pa promove bienestar, oportunidad y proteccion pa mucha y hobennan den Reino. The post Minister Wyatt-Ras a firma Intentieverklaring pa fortalece participacion di hobennan den Reino appeared first on Aruba Native.