[ata: foa'i]
By LALI STAFFPago Pago - AMERIKA SAMOA
O nisi o i latou sa fa’aleoina o latou manatu, i le fonotaga lea sa fa’ataunu’uina i le aso Lulu, Iulai 1, 2025 i le Fale Laumei i Utulei, sa aofia ai le susuga ia Taulapapa Willie Sword ma sa ia ta’ua ai le latalata o le nofoaga ua fuafua e faia ai lenei galuega (deep sea mining), ma sami fa’asao (Exclusive Economic Zone) a le atu Kuki.
Ma ua mae’a ona pasia e le atu Kuki ia se tulafono, e faatagaina ai le eliina o latou sami loloto (deep sea mining) ma ua mae’a foi ona sainia se konakarate mo lea galuega, ma se kamupani mai Saina.
Sa fa’aleoina e Taulapapa lona popole tele, i le a’afia o sami o Amerika Samoa, i lea galuega o le a faataunu’u i gataifale o le atu Kuki.
E le gata i lea, sa fa’apupulaina e Taulapapa le iai foi o nisi laisene mo le faia o nei ituaiga galuega i totonu o le Pasefika – aemaise i ogasami i le va o Hawaii ma Kalefonia – i ni kamupani mai Saina. Ma faaleoina ai e Taulapapa, ia se lapata’iga, i le iai o Saina i o tatou faitoto’a ma afai ae le feutagai tagata o Amerika Samoa ma lenei mataupu, o le a faapea ona tiaiina i tatou i tua a a’afia ai puipuiga faavaomalo.
Sa faapea fou ona saunoa Taulapapa, lea o lo’o avea nei ma taitaifono o le itu Ripapilikana, i ni penefiti faaletamaoaiga, e mafai ona maua mai i nei ituaiga galuega. E pei o tupe maua mo le matagaluega o uafu ma malae vaalele, ma le mana’omia o tautua lotoifale e pei o le sapalaiina o suau’u, avea ma nofoaga e mafai ona taula ai va’a mo le galuega faapea ma le teuina o masini.
Ae i le saunoaga a le susuga ia Bret Butler, sa ia fa’amamafaina ai le toe manaomia o nisi fa’amatalaga po o ni suesuega ua mae’a ona faataunuuina, e mafai ai ona faia ai se fa’ai’uga tonu ma le sa’o mo Amerika Samoa. Sa ia ta’ua e faapea, e na o le pau le mafua’aga e a’afia ai le EEZ a Amerika Samoa i lenei galuega ua fuafuaina, ona o lo’o aofia ai le Rose Atoll – ma ia faapupulaina mai ai e faapea, i tulaga o galuega faapenei, e malosi lava le pule a le malo feterale.
Sa faamamafaina e Butler le taua o le fa’aauauina ona faia o nei feutagaiga faalauaitele ma ia u’una’ia ai tagata o le atunu’u, ina ia auai i nei fonotaga faifaipea.
O lo’o ua fuafuaina le fa’aauau pea o nei ituaiga fonotaga mo le mamalu lautele, i le 30 aso lea o lo’o tatalaina mo le fa’aulufaleina o manatu mai i le mamalu o le atunu’u, e tusa ai ma lenei mataupu.
Ua mae’a ona talosagaina e le kovana, ia le BOEM mo le tu’uina atu i tua o le aso e faagata ai ona faaulufaleina manatu fa’aalia, ae e le’i maua mai se tali mai i le malo feterale.
I le manatu fa’aalia a le afioga i le Faipule mai Swains, le susuga ia Alex Jennings, sa ia faaleoina ai lona atugalu e tusa ai ma manatu fa’aalia i lenei galuega ua fuafua i totonu o sami a Amerika Samoa.
I le avea ai o ia ma taitaifono o le komiti o Alagamanuia o le sami ma le vaomatua, a le Maota o Sui faapea tagata o le motu o Swains, na saunoa le afioga i le Faipule i le ‘oga’oga o lenei mataupu. Ma sa ia momoli le agaga fa’afetai ia Dr. Sabrina Sulua-Mahuka e tusa ai ma lana ripoti auiliili e fa’atatau i a’afiaga o le siosiomaga i lenei galuega ua fuafuaina, ma o se tulaga e ao ona nofouta ai le atunu’u.
Ae peitai, sa faamamafaina e Jennings le tatau ona paleni o itu uma o finauga. Ma sa ia ta’ua foi le mae’a ona iai o se fa’atonuga aloaia mai i le Peresetene o le Iunaite Setete i lenei mataupu. Sa saunoa Jennings, e amata loa lenei galuega, e leai seisi mea e mafai ona toe faia e le atunu’u. Ae o lana fesili, po o le a se tulaga e ao ona faia e mafai ona penefiti ai Amerika Samoa.
Sa ta’ua e Jennings lona le talitonuina, e mafai e le teritori ona taofia le galuega a le malo feterale ua mae’a ona fa’ata’atia. E pei ona sa ia ta’ua, o a lava mea e tutupu atu i tua atu o le tolu maila fa’atulagaina mo Amerika Samoa, e leai so tatou malosiaga e toe o’o atu iai. Ma sa ia ta’ua foi lona va’aia o ia tulaga, o tutupu foi i taimi ua tuanai.
Ae e ui i ona atugaluga, sa fa’asilasila mai e le alii Faipule ia lona fa’atulagaina o se iloiloga a le komiti, mo le toe iloiloina o lenei mataupu, ae e le’i fa’amutaina le toe taliaina o manatu fa’aulu. Ma i sona faamoemoega, o le a mafai ona taliaina le talosaga a le teritori, mo le tolopoina o le aso e fa’agata ai ona mafai ona faauluina ni manatu mai tagata o le atunu’u, e tusa ai ma lenei mataupu.
I se fa’atalanoaga ma le alii Faipule, sa ia ta’ua ai le fa’aauau pea ona ia mauaina o ni ripoti e tusa ai ma le tele o le minerale o lo’o maua i ogasami e pei ona ta’ua. O le motu o Swain, o lo’o tuaoi ma le EEZ a To’elau i le itu i matu, ae tuaoi ona ogasami ma ogasami a le atu Kuki i le itu i matu sasa’e. Ae peitai, i ripoti lata mai, o lo’o fa’aalia ai le ta’ua ai ogasami o lo’o fuafua mo le eliina, o lo’o limiti i sami o lo’o li’oina Manu’a ma le Rose Atoll, lea o lo’o tuaoi ma ogasami o le atu Kuki i le itu i sasa’e.
Sa toe faaleoina e Jennings ia atugaluga e pei ona sa saunoa iai Taulapapa, i se lapataiga e tusa ai ma tuaoi faavaomalo, e laititi se puipuiga e ono maua mai ai aemaise ai ona o lo’o a’afia ai le malo o Saina.
Section: Le Lali
View the discussion thread.