[ata: SN]
By LALI STAFFPago Pago - AMERIKA SAMOA
O le taeao o le aso Faraile o le vaiaso ua mavae, Me 2, 2025, na fa’ataunu’uina ai se sauniga taua i le fale’ai toe fa’afouina a le maota gasegase i Faga’alu – LBJ Tropical Medical Center. O lenei poloketi na aofia ai le toe fa’afouina o vaega uma o le fale’ai, faapea ma masini fou, ina ia ausia vaega fa’atulagaina o falema’i i Amerika.
O lenei poloketi e $3.4 miliona lona tau, sa fa’atinoina i masina e 12 ma o le ata o le fale ‘aiga fou, sa tusia e le kamupani a Joe Weilenman ae galuea’iina e le JP Corporation, lea e pulea e Satele Iupeli Kava.
Sa auai le to’atele o ta’ita’i o le malo i le sauniga i le taeao o le aso Faraile, na aofia ai le Afioga i le Peresetene o le Senate, ia Tuaolo Manaia Fruean, o le Afioga i le Fofoga Fetalai, Savali Talavou Ale, o le susuga ia Afamasaga Dr. Talifa se tasi o totino o le komiti faafoe a le LBJ, o le Taitaifono o le komiti faafoe a le LBJ ia Mualeava Dr. Aifili Tufa, o le pulesili a le falemai ia Dr. Scott Anesi, faapea taitai sinia o le falemai.
O le susuga i le Faafeagaiga a le LBJ, ia Rev. Tumau Petaia sa fa’amanuiaina le fale’ai fa’afouina ae o le Afioga i le Lutena Kovana Pulumataala Ae Ae Jr., sa ona ia tau’a’aoina le lipine e tatala aloaia ai le fale’ai.
I le saunoaga a le Afioga i le alii Faipule ia Faimealelei Anthony Allen, o se tasi o totino o le komiti fa’afoe ma o ia foi sa avea ma fofoga o le aso, sa ia ta’ua ai le fa’afia ona sala o le falemai ona o le tulaga faaletonu na iai le fale’ai tuai.
Sa saunoa foi le pule o taumafa maloloina (Dietary Manager) ia Ianeta Ah Ping, ua fitu tausaga o fuafuaina lenei galuega. Ma na i’u ina pasia mai i le vaitaimi o avea le susuga ia Faumuina John Faumuina ma faatonusili o le falema’i. O le vaitaimi na tula’i mai ai Moefaauo Bill Emmsley i le foe, na tu’uina atu ai lenei galuega mo tauofoga. Ae o le vaitaimi o le taitaiga a le Dr. Akapusi Ledua sa fa’amautuina ai le vaegatupe mo lenei galuega.
I le tausaga ua mavae, i lalo o le taitaiga a le Faatonu o Scoot Anesi sa faapea ona fa’agaioi ai loa lenei galuega ma fa’amae’aina ai.
Sa fa’aleoina e le afioga i le Lutena Kovana faapea le Peresetene o le Senate ia le agaga fa’afetai, i le pulega ma le komiti faafoe a le falema’I mo le fa’amae’aina o lenei galuega, aua le tautuaina o le mamalu lautele faapea gasegase.
Na fa’amamafaina e le afioga i le Lutena Kovana ia mafai ona fa’ataunu’uina o galuega fa’aleleia tetele faapenei, e ala i le galulue fa’atasi. E le gata i lea, sa ia aloa’ia ia le taua o le vaega a tagata faigaluega o le a galulue i totonu o le fale ‘ai fa’afouina.
Sa fa’amamafaina e le tofa ia Tuaolo, ia le lagolago malosi o le Fono Faitulafono i poloketi faapenei ma e latou te taliaina so’o se fuafuaga e fa’aleleia atili ai le falema’i ma sa ia saunoa foi i le taua o le tausiga lelei o le falemai ina ia mafai ona umi ona tautuaina le atunu’u.
Na fa’aleoina foi e le alii faatonu ia Dr. Anesi ia lona agaga fa’afetai i le lagolago malosi o le Fono ma le Komiti Faafoe a le LBJ, ae le gata i lea, o talosaga fai pea a le susuga i le Fa’afeagaiga a le falema’i, ua mafai ona tino mai ai lenei faamoemoe.
Ma sa ta’ua e faapea, o lenei poloketi ua na’o se tasi ole tele o poloketi o lo’o faamoemoe le Komiti Faafoe, le pulega ma le aufaigaluega a le falema’i, e fa’atinoina aua taumafaiga fa’agasolo pea, mo le fa’aleleia atili o lenei auaunaga.
I le saunoaga a le pule o le PJ Corporation, sa ia ta’ua ai e faapea, o tulaga uma sa fa’aaogaina i lenei galuega, o lo’o mafai ona ausia tulaga fa’amalosia mai e le malo o Amerika.
Section: Le Lali
View the discussion thread.