[ata: foa'i]
By LALI STAFFNIU SILA
I le mae’a ai o se iloiloga a se faamasinoga i Niu Sila, ua fa’atonuina ai le susuga ia Leuluaiali’i Olinda Woodroffe, e na te totogia se tinoitupe e $66,000 ona o lona le faatinoina lelei o ona tiute faufautua i se tasi na sulufa’i atu ia te ia mo se fesoasoani tau i le tulafono, atoa ai ma lona fa’asalalauina o ni fa’amatalaga puipuia i luga o leitio i Niu Sila atoa ai ma lona fa’afefeina o lea tagata, i se tagi e faaulu i le tulafono.
O Leuluaiali’i o se tamaitai loia Samoa e galue i totonu o Niu Sila ma Samoa ma o lenei faalavelave na tula’i mai a’o ia fesoasoani i se alii Samoa o lo’o nofo i Niu Sila, i se mataupu tau i fanua i Samoa.
E tusa ai ma ripoti o lenei mataupu, sa totogia e le na a’afia, ia Leulua’ialii mo sana auaunaga, na amata mai ia Fepuari 2015 ma o Iulai 2016 na faila ai se ‘statement of claim’ i le Faamasinoga Maualuga i Samoa.
Ia Oketopa 2019, na fa’ailoa atu ai e Leuluaiali’i i le na a’afia, e mana’omia ona ia totogia se vaegatupe e $35,000 (security costs) ma sa faapea ona faatonuina ai o ia e le na a’afia, e taofia le toe faia o seisi galuega.
Ia Setema 2020, sa faapea ona tusi atu ai le na a’afia ia Leulua’ialii, i lona le malamalama e tatau ona ia totogia se ‘security cost’, ma e le’i fa’amanino atu foi ia te ia e Leulua’ialii lea tulaga. Ma sa talosagaina ai e le na a’afia ia le faauluina e Leulua’ialii o se fa’atonuga, e taofia ai lana mataupu, i totonu o le faamasinoga.
I ni nai aso na soso’o ai, sa tali mai ai Leulua’ialii i le le faamaoni ma le fa’aleaga tagata o tu’ua’iga a le na a’afia. Ma na ta’ua e Leulua’ialii le faamalamalamaina fa’atele, mai ia te ia (le na a’afia) ia tulaga o ‘security cost’ i le gagana Samoa, atoa ai ma tusi o lo’o iai, e fa’amaonia ai lea lava tulaga.
E tolu aso na soso’o ai, ae auai Leulua’ialii i se polokalama i luga o le ‘ea (Radio Samoa) ma sa talanoaina ai e Leulua’ialii ia lenei mataupu.
O Novema 2020, sa tusi atu ai le na molia, i le Faamasinoga Maualuga i Samoa ma fa’ailoa atu iai, lona le malamalama i se fa’aupuga e ta’ua o le ‘Security for Cost’ ma e le’i fa’ailoa atu foi e Leulua’ialii lea tulaga, ia te ia.
Ina ua nofo malamalama Leulua’ialii e tusa ai ma lea tulaga, sa faapea ona ia imeli atu i le na a’afia ma faatonuina o ia, ina ia toe tusi i le faamasinoga e fa’ailoa iai le le moni o lana ripoti, a leai, o le a ia faaulu sana (Leulua’ialii) tagi e faasaga i le na a’afia.
O Tesema 2020, sa faapea ona faaulu ai e le na a’afia sana fa’asea i le Sosaiete o Loia ma Faamasinoga.
O le masina o Ianuari, o le tausaga nei, sa maua mai ai se faaiuga mai i le faamasinoga na iloiloina lenei mataupu, ma fa’amaonia ai le pa’u ia Leulua’ialii ona fautuaina le na a’afia e tusa ai ma ‘security for costs’, e le gata i lea, o le fa’aaogaina sese e Leulua’ialii o lona tofiga fa’aleloia, e fa’asagatau ai i le na a’afia, i luga o le leitio faapea ai ma le fa’afefeina o ia i se tagi i le tulafono.
Sa ta’ua e le vaega iloilo le leai o se tusi na fa’ao’oina atu e Leulua’ialii, e fa’amaonia ai lona fautuaina o le na a’afia e tusa ai ma ‘security for costs’.
E le gata i lea, o le faaletonu o fautuaga na tu’uina atu e le tamaitai loia i le na a’afia, sa ave’esea ai lona avanoa e iloilo lelei ai tulaga uma i lana mataupu, ma i ana faamatalaga i luga o le leitio, sa faamatalaina ai e le tamaitai loia uiga o le na a’afia, o se tagata faamaualuga faapea ma le va’ai maualalo o le tamaitai loia i le le taliaina e le na a’afia, o ana fautuaga ina ia fa’aauau le mataupu i faamasinoga i Samoa.
Ua taofi foi le vaega iloilo, o le taumafaiga a le tamaitai loia e su ia le na a’afia, o ni uiga tau fa’amata’u ma e le o ni uiga ia e tatau ona umia e se loia. E le gata i lea, sa ta’ua e vaega iloilo ia nisi o uiga le lelei o le tamaitai loia, o lona osofa’ia lea o le na a’afia, ina ua fa’asea i lona le malamalama.
Ma sa fa’aalia foi e le vaega iloilo e faapea, e fitu nisi fa’asea ua failaina i le va o le 2014 ma le 2025, e fa’asaga i le tamaitai loia. Ma o le tolu o nei fa’asea, o lo’o ta’ua ai le
Sa faatonuina le tamaitai loia, e toe totogi le $10,000 i le na a’afia faatasi ai ma le fa’amagaloina o le $5,082 o lo’o totoe.
E le gata i lea, na fa’atonuina o ia e totogi le $10,000 i le Sosaiete o Tulafono a Niu Sila, o le $34,712 i le Komiti o Auckland Standards faapea ma le $11,337 e totogi ai le vaega iloilo.
O le faitau aofa’i o le tupe ua faatonuina Leulua’ialii e totogia, e $66,049.
Sa apili e Leulua’ialii lenei faai’uga i le Faamasinoga Maualuga.
[source: Samoa Observer]
Section: Le Lali
View the discussion thread.