[ata: SN]
By Okalani EtuatiVAEGA 9
E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa. E fa'atalofa atu i le faaopoopoga fou o le tatou Fagogo i lenei tausaga fou 2025. E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.
Ia ae se'ese'e mai loa i ou se'etaga malu, ae o le a taumafai atu le tatou Fagogo fou - O TEINE E TO’ATOLU MA LE TAMA NA LEILOA.
************************************************
Na gata mai le tatou Fagogo i le vaiaso ua mavae, ina ua alu le teine laititi, po o le ui’i o le fanau teine e to’atolu a le ulugalii gaosi falaoamata, e saili sona manuia mai i le alii mau’oa, lea o lo’o tau saili lona atalii.
O lo’o tau saili e le alii mau’oa ia se tagata e mafai ona nofo i totonu o se potu o lona maota, lea o lo’o ripotia mai le iai o se mea e tupu i le tu lua o po ma ao.
Ma ua mae’a ona o mai ia uso matutua e to’alua a le fanau teine e to’atolu, a le ulugalii gaosi falaoamata ma fa’amanuiaina a la taumafaiga ma o la toe fo’i i le aiga ma le ta’i $300 mai i le tamaloa mau’oa.
A’o lea ua sau le teine laititi, po o le ui’i a le aiga, ina ia taumafai foi sona laki, pe fiti.
Na mae’a lelei ona fa’atonutonu e teine matutua ia lo la uso laititi, i tali e tali ai i le alii pe a va’ai iai le teine laititi, i lea po.
Ae peitai, ina o fesili mai le alii i le teine laititi, po o ai e ana mea’ai ia ua mae’a ona saunia. Na fai sina umi o fa’ataupupula atu le teine laititi i foliga o le alii ma sa faatumulia lona loto i le alofa, i foliga fa’anoanoa o le alii, ma ua ia le tali atu ai i le tali na a’oa’o ai o ia e ona uso matutua.
Na avea le umi o tu o le teine laititi, ua le tali, na toe fesili mai ai le alii lea, po o ai e ana mea’ai ia ua mae’a ona saunia. Ua faapea atu loa le teine, “O mea’ai sa ou saunia mo lau susuga, pe afai o lo’o e fia taumafa ai.”
E le’i uma lelei atu le tali a le teine laititi, ae ona va’aia le suia o foliga o le alii lea o tu i ona luma. Ua foliga mai ua tau mou ‘ese atu ona foliga fa’anoanoa. Ona toe fesili atu lea o le alii i le teine, ‘Ae o ai o le a ‘a’ai i luga o le laulau ‘ai ua e saunia?”
“Na ou saunia mo a’u lava, ae su su mai e ta te fai aiga faatasi,” o le tali atu lea a le teine laititi.
Sa va’aia e le teine le liua o foliga o le alii i foliga fiafia. Ma lana toe fesili i le teine laititi, “Ae o ai ua mafua ai ona faia lenei afi?”
“Na ou faia ou te fa’amafanafana ai, ae o lo’o tele le avanoa e ta te fa’amafanafana uma ai,” o le tali atu lea a le teine laititi.
Ua patipati leotele lima o le alii ma ia faapea atu i le teine laititi. “Fa’afetai mo le valaaulia. Ma ua ou talia lau vala’aulia, ae faatali muamua, so’u alu ou te fa’afetai i nai a’u uo mo le tausiga lelei o a’u.”
[E FAIA PEA]
Section: Le Lali
View the discussion thread.